Verdiskaping i klippfisknæringa 2009-13

Abstract

I meir enn 300 år har klippfisk vore ei viktig næring i Noreg. Den norske eksportverdien av klippfisk var i 2013 på ca. 3,1 mrd. kr. Omlag 90 % vart utskipa frå Nordvestlandet. Tek ein med saltfisk, aukar eksportverdien til ca. 3,9 mrd. kr. Samla utgjorde dermed eksporten av klippfisk og saltfisk ca. 6,3 % av total norsk fiskeeksport som i 2013 representerte ca. 61,6 mrd. kr. Næringa er viktig for verdiskaping og sysselsetjing. Sjølv om tyngdepunktet for produksjon er på Nordvestlandet, kjem store delar av råstoffet frå Nord-Noreg, slik at næringa er viktig for verdiskaping og sysselsetjing også der. Likevel er kunnskapen om kva verdiar denne næringa skaper avgrensa. I denne rapporten vert verdiskapinga i den innanlandske verdikjeda for klippfisk, som omfattar fangst, foredling og eksport, analysert for fem års-perioden 2009–2013. Samla verdiskaping inkludert ringverknader auka frå vel 2,9 mrd. kr. i 2009 til knapt 4,3 mrd. kr. 2011, men med ein reduksjon til 3,4 mrd. kr. i 2013. Når ein tek omsyn til ringverknader, var samla sysselsetjing i verdikjeda for klippfisk vel 5.100 i 2013 med 3.300 innan fangstleddet of 1.800 innan foredling og eksport.