| dc.description.abstract | Denne oppgåva skildrar ei undersøking av jobbtilfredshet og affektiv tilhøyrsle blant tilsette ved den offentlege tannhelsetenesta i Møre og Romsdal fylkeskommune. Undersøkinga vart gjennomført som ein tverrsnittstudie med data frå to ulike tidspunkt med høvesvis 138 og 136 respondentar. Formålet med studien var å undersøkja om ulike ressursar kunne påverke tilsette sin jobbtilfredshet og affektive tilhøyrsle til verksemda. Det vart tatt utgangspunkt i myndiggjerande leiing og rettvis leiing som jobbressursar, og meistringsevne som personleg ressurs for å sjå om dette var tilhøve som kunne påverke tilsette sin jobbtilfredshet og affektive tilhøyrsle ved begge tidspunkta. Gjennom hierarkiske regresjonsanalyser synte resultata at dei ulike ressursane signifikant gjorde greie for noko av variansen i jobbtilfredshet, sjølv om myndiggjerande leiing og rettvis leiing hadde signifikante bidrag på ulikt tidspunkt. Samla sett kunne ikkje jobbressursar og personleg ressurs påverke affektiv tilhøyrsle. Dette då meistringsevne var einaste signifikante prediktor. I tillegg vart det undersøkt om jobbtilfredshet kunne påverke affektiv tilhøyrsle når dei ulike ressursane var kontrollert for. Det vart funne at jobbtilfredshet signifikant påverka affektiv tilhøyrsle, samstundes vart det synt at jobbtilfredshet var den viktigaste prediktoren for affektiv tilhøyrsle i denne studien. Ut i frå resultata kan ein konkludera med at tilsette sin personlege ressurs påverkar både jobbtilfredshet og affektiv tilhøyrsle, medan jobbressursar berre kan forklare jobbtilfredshet. Av dette vert det føreslått at bidrag til å auka tilsette si positive vurdering av ressursar vil vere gunstig då dette påverkar jobbtilfredshet. Dette vil vere fordelaktig då jobbtilfredshet påverkar tilsette si affektive tilhøyrsle til verksemda. | nb_NO |
